Cheque-Iwwereeschung am Kader vum Tournoi de Noël

22.02.2019 09:00

Cheque-Iwwereeschung am Kader vum Tournoi de Noël

Well mir als Studenten net nëmmen ob eis wëlle kucken, mee och der Gesellschaft eppes wëllen zeréck ginn, entscheede mir eis all Joer de Gewënn, de mir um Tournoi de Noël maachen, un zwou verschidden Associatiounen ze spenden. Dëst Joer hu mir eis fir d'Association Narin an d'Fondation Maison de la Porte Ouverte decidéiert.

Um Tournoi de Noël si mir als ACEL zoustänneg fir d'Verfleegung vun de Sportler a Supporteren. Mam Wëssen, dass mer de Gewënn, dee mir wärend deenen 2 Deeg maachen, un gemengnëtzeg Organisatioune spenden, hunn sech d'Leit och net zeréckgehale mam Consomméieren vu Gedrénks. Dofir si mer frou, den zwou Associatioune jeeweils en Chèque am Wäert vun 2636,35€ kënnen z'iwwerreechen.


ACEL mat Narin

D'Association Narin ass eng 2015 gegrënnten A.s.b.l., déi aus enger Kleederkollekt fir Flüchtlingen entstanen ass, a säitdeem verschidde Projeten an Aktiounen organiséiert, déi bedürftege Leit an den ënnerschiddlechste Punkten hëllefen. Mat eisem Geld gëtt en Stipendium fir d'Uni.lu finanzéiert, mat deem een oder méi Flüchtlinge wärend hirem Studium ënnerstëtzt ginn, deenen och elo schonn d'Association ënnert d'Äerm gräift.


ACEL mat FMPO

D'Fondation Maison de la Porte Ouverte ass ebenfalls eng A.s.b.l., déi schonn 1971 gegrënnt gouf, an sech zënterhier em di äermste Leit aus dem Véierel Lëtzebuerg-Gare këmmert. Hautdesdaags geréieren si puer Centres d'Accueil, wou virun allem Kanner an Jugendlecher opgeholl ginn an mat hinne geschafft gëtt. Mat eisem Geld gëtt en "Regroupement familial" ënnerstëtzt, wou en Jugendlechen, deen eleng zu Lëtzebuerg gelant ass, mat senger Mamm a sengen 2 Geschwëster, déi am Ausland festsetzen, soll réunéiert ginn.

Mir freeën eis, mat eiser Spend sou gudde Projeten ënnert d'Äerm kënnen ze gräifen a wënschen den zwou Associatiounen och an Zukunft vill Erfolleg bei hirer Aarbecht.

Neiegkeeten vu Studenten fir Studenten

Abonnéier den ACEL Newsletter. Du kanns dech zu all Moment ausdroen.



Mat klick op "Fäerdeg" bestätegs du, dass du mat eisen Datenschutzerklärungen averstanen bass an mir dir Mailen schécken dierfen bis du dech erëm vum Newsletter ofmells.