D’lescht Joer war den Tournoi de Noël de 27. an 28. Dezember 2019 um Campus Geesseknäppchen.

 

Hei fannt dir alles zum Tournoi de Noël 2019:

Wéi an deene Jore virdrunner war et am Dezember 2019 nees souwäit an d’ACEL huet a Kooperatioun mat der LASEL den Tournoi de Noël organiséiert.

Bei dësem Event handelt et sech em en Turnéier an dräi verschidde Sportaarten: Basket, Volleyball a Fussball. Déi verschidde Cerclen treffen sech um Campus Geesseknäppche fir iwwer zwee Deeg géinteneen unzetrieden.

D´Editioun 2019 huet no de Chrëschtdeeg, de 27. an 28. Dezember, stattfonnt an zuelräich Sportler a Supporter an d’Hale gelackelt.

Gestart huet dat ganzt Freides moies mam Basket- a Volleyball, wou an deene verschiddene Poulen d’Virronn gespillt ginn ass, a Mëttes sinn d´Finalle gespillt ginn. Samschdes war et dunn un de Fussballspiller, déi am nämmlechte System d´Gewënner ermëttelt hunn. Di ganz Spillpläng an Organisatioun vum sportlechen Deel loung an den Hänn vun den Dammen an Häre vun der LASEL, mat deene mer elo schonn eng länger Zäit gutt zesumme schaffen an deene mer heimat nach eemol Merci wëlle soen.

Am Basket huet Köln gewonnen, am Volleyball Freiburg an am Fussball war et de Cercle vun der Tréier. Den “Overall Winner”, och “Challenge Jean Schmit” genannt, waren dunn awer d’Studenten aus Saarbrécken, déi am Volleyball 3. gi sinn, am Fussball 7. an sech am Basketball net manner wéi déi 2. Platz séchere konnten.

Fir d’Iessen hunn dëst Joer 5 vun eise Cercle gesuergt. Eis Kolleege vu Berlin hu gegrillt an, fir si typesch, Currywurscht verkaf an zousätzlech Kuch verkaf, d’Studente vu Bingen hunn eis lecker lëtzebuergesch Kniddele gekacht an d’Innsbrucker hunn eis hir Spezialitéit, den Tiroler Gröschtl, zerwéiert  Freides huet Heidelberg Chili con Carne gekacht a Samschdes hunn d’Leit aus Holland Paninien verkaf. Hinnen nach eng Kéier e grousse Merci dofir, dass keen huet missen hongereg Heem goen!

Och dëst Joer gëtt de gesamten Erléis aus dem Verkaf vu Gedrénks fir karitativ Zwecker gespent. Mir freeën eis der Association Narin a Care in Luxemburg a.s.b.l. den Erléis vum Tournoi 2019 ze spenden.

Mir soe jidderengem, de Sportler, Supporter an Organisateuren, Merci a freeën eis op di nächst Editioun am Dezember 2020.