Student fir 1 Dag

poster-a2-2017.png

Du wëlls wësse wat dech op der Uni erwaart? Dann sief Student fir 1 Dag a géi mat op eng vun den Dagesreesen an déi verschidden Universitéitsstied, organiséiert vun der ACEL zesumme mat Voyages Emile Weber. Looss dir d’Uni, de Campus an d’Stad selwer vun de lëtzebuergesche Studenten op der Platz weisen an erklären.


Och 2018 fënnt de Student fir 1 Dag rem an der Ouschtervakanz teschend dem 31.03 a 15.04 statt. De genaue Programm esou wéi d'Umeldung fir dës Editioun starten am Ufank vum Joer 2018.


Um Programm stinn d’Visite vun den Uni’en a vun deene wichtegste Gebaier vum Campus, ewéi d’Bibliothéik, d’Hörsäll oder d’Administratiouns Gebaier. D’Visite ginn mat engem Iessen oder engem Patt am Stamm-Restaurant/Café vum jeeweilege Cercle ofgeronnt. Natierlech gëtt während dem ganzen Dag op all méiglech Froe geäntwert an et entsteet ee gudden Austausch tëschent Schüler a Studenten.

Als 1ère oder 13ème* Schüler steet en viru wichtegen Entscheedunge fir d’Zukunft. Soll ee studéiere goen oder net? An weieng Uni ass fir mech iwwerhaapt déi richteg? De Projet «Student fir 1 Dag» bidd dir eng eemoleg Geleeënheet, dir d’Unien an d’Unisstied op eng ganz besonnesch Aart a Weis kennen ze léieren an dir bei dengen Entscheedungen ze helefen.

(*Du dierfs och matgoen wann du nach net op 1ère oder 13ème bass)

2017 si mir a folgend Stied gefuer:

Datum Stad Präiss Programm
8. Abrëll Nanzëg 39€ Programm
10. Abrëll Maastrich 39€ Programm
11. Abrëll Frankfurt 39€ Programm
12. Abrëll Kaiserslautern 39€ Programm
13. Abrëll Köln 39€ Programm
14. Abrëll Tréier 20€ Programm
15. Abrëll Stroossbuerg 39€ Programm
18. Abrëll Bonn 39€ Programm
19. Abrëll Breissel 39€ Programm
20. Abrëll Oochen 39€ Programm
20. Abrëll Léck 39€ Programm
21. Abrëll Karlsruhe 39€ Programm
22. Abrëll Düsseldorf 39€ Programm

FAQ:

Ech sinn nach net op der 1ère/13ème dierf ech awer mat goen?
Jo, jiidereen de wëll dierf mat goen.

Bis wéini kann een sech umellen?
Bis 2 Deeg virun der Rees.

Ech hunn mech ugemellt, wat elo?
Wann s du dech bis ugemellt hues, kriss vu Voyage Emile Weber eng Confirmatioun per POST geschéckt, déi muss du Ënnerschreiwen an un Voyage Emile Weber zeréck schécken, eréischt dann ass deng Umellung komplett.
1 Woch virum Depart kriss du vun hinnen eng Rechnung geschéckt.

Wéini muss ech meng Rees bezuelen?
1 Woch virum Depart kriss du vum Voyage Emile Weber eng detailléiert Rechnung Heem geschéckt mat all néidegen Informatiounen zu der Iwwerweisung.

Ech hunn mech ugemellt mee ech ka leider awer net matgoen. Wou kann ech mech nees ofmellen?
Du kanns dech bis 2 Deeg virun der Rees nees bei Voyage Emile Weber (reception@vew.lu) ofmellen. Wann s du dech eréischt 2 Deeg virun der Rees oder dech guer net ofmells kriss du deng Sue leider net zeréck.

Ech hunn Problemer mat der Umeldung.
Bei Problemer bei der Umeldung mell dech w.e.g. bei eis.

Autorisation Parentale:

Brauch ech eng Autorisation Parentale?
Wann s du den Dag vun der Rees ënner 18 Joer hues, da brauchs du eng Autorisation Parentale.

Wou kréien ech eng Autorisation Parentale?
Dës kriss du bei denger Gemeng.
D’Autorisation Parentale muss op d’ACEL ausgestallt sinn.

Rees:

Fuer dir och an aner Stied?
Nee leider fuere mir just an déi Stied déi uewe stinn.

Ass et méiglech op Oochen an op Léck gläichzäiteg ze fueren?
Nee leider kann een net op Oochen an op Léck matenee fueren, all aner Kombinatioune sinn awer méiglech.

Ech hunn ënner 18 Joer dierf ech awer mat?
Du dierfs op all Rees mat ausser Maastrich. Du brauchs just eng Autorisation Parentale.

Wat ass alles am Präis mat dran?
D'Busfaart dohin an zréck esou wéi och ee Mëttegiessen.

Wat fir eng Unie gi mir kucken?
Op de jeeweilege Programmer vun de Stied, gesäis du wat fir eng Unien a wat fir enger Stad ugekuckt ginn. Wann deng Uni elo net dobäi ass kanns du dech bei deem jeeweilege Cercle mellen (Kontaktdate stinn um Programm). Wann genuch Leit sech fir déi Uni interesséieren, kann et sinn dass de Cercle och dës Uni ukucke geet.

Ween organiséiert dës Reesen?
D’Reese gi vun der ACEL an Zesummenaarbecht mat de Cerclen an de jeeweilege Stied, souwéi och mat Voyage Emile Weber organiséiert. An der Studentestad sidd dir déi ganzen Zäit vun de Lëtzebuerger Studenten aus der jeeweileger Stad encadréiert.

Hues du nach weider Froen? Da mell dech bei eis.

poster-a2-2017.png

Neiegkeeten vu Studenten fir Studenten

Abonnéier den ACEL Newsletter. Du kanns dech zu all Moment ausdroen.