REEL

• TBA
• TBA
• TBA

TABLE RONDE:

• TBA
• TBA

Prix flambants et retraites en danger : un avenir prospère, est-il toujours possible au Luxembourg?

• TBA
• TBA
• TBA

TABLE RONDE:

• TBA
• TBA

Zukunft gestalten: Kompetenzen am Kontext vun der Digitaliséierung

• Thema vun der Table ronde: Hei gouf et méi Erklärungen zum Thema vun der REEL an et gouf ee gemeinsamt Meenungsbild ausgebaut. Ausserdem hu mir d’Analyse vun eiser Ëmfro presentéiert déi an de Wochen virun der REEL bal 100 mol ausgefëllt gouf.
• Dat neit ASBL-Gesetz: Dëse Workshop hat als Zil de Cerclen Erklärungen zum neien ASBL-Gesetz ze ginn, fir hinnen domat den Iwwergang méi einfach ze gestalten an drop opmierksam ze maachen, dass mir alleguer dovu betraff sinn.
• Pensiounsreform: Hei hunn mir probéiert de Student:innen de Problem ze erklären dee mir alleguer an Zukunft hätten an éischt Meenungsbiller an Ängscht ze verstoen an opzehuelen.

TABLE RONDE:

• D‘Haaptpunkten déi d’ACEL an der Table Ronde op der REEL beschäftegt huet, hu sech vum État des Lieux bis zu eiser Zukunft verdeelt. Am Ufank wollte mir iwwert den aktuellen Stand schwätzen, dofir hu mir och eenmol de geschichtleche Wandel vun der Schoul gekuckt. Eens si mir eis op dem Punkt ginn, dass d’Benotzung vum Täscherechner an den Schoulen net onwichteg ass an dass den op alle Fall net verbuede sollt ginn. Iwwer aner Punkte ware mir ons an der éischter Halschent vun der Table Ronde manner eens bzw. et si keng kloer Meenungen vun aneren Invitéeën geäussert ginn.
• An der zweeter Halschent sinn mir méi op d’Zukunft agangen an hunn driwwer diskutéiert op een och Aarbechten mat kënschtlecher Intelligenz schreiwen soll an dierf a wéi dest geregelt sollt ginn. Eng kloer Äntwert huet sech och do erëm net erauskristalliséiert vun den Invitéeën. Eens si mir eis am Endeffekt ginn, dass d’Softskills eng ganz wichteg Roll an Zukunft spille wäerten, mee wéi dës besser geléiert ginn an ob mir [Gen Z] op Zukunft virbereet sinn a keng Angscht mussen hunn eppes verpasst ze hunn, konnt ons och kee soen.

Interoperabilitéit – Europaiwwergréifend Komptabilitéit

• Thema vun der Table ronde: Hei hu mir d’Thema mat de REELaner opgeschafft an doduerch deen een oder aneren Punkt méi mat an d’Table ronde geholl.
• Teambuilding am Comité: Hei gouf gekuckt wate en am Comité zesumme kann ënnerhuelen fir eng angeneem Aarbechtsatmosphär ze schafen an wéi eeng Problemer virbeugen oder leise kann.
• Wéi organiséieren ech en Intercercle?

TABLE RONDE:

• Prioritéite fir d’ACEL an der Table Ronde waren an éischter Linn dorop opmierksam ze maachen, dass et bei wäitem net esou einfach ass vun der enger Uni op déi aner Uni ze wiesselen, obwuel dat wéinst dem Bologna Prozess sou sollt sinn. Doropshi méi genau an d’Thematik mat der Iwwersetzung vun den Diplomer drop an ze goen. Des Weidere war d’Nofro un den Héichschoulministère grouss, déi unerkannte Studie méi transparent ze kommunizéieren.

• E weideren Diskussiounspunkt war ob et sënnvoll ass ze fuerderen, dass e Studium iwwerall de selwechten Inhalt soll hunn. Hei e Beispill dofir: En:eng Ingenieur:in deen an Holland studéiert, léiert de Moment vill iwwert de Bréckebau, wat an der Regioun, wou e studéiert méi gebraucht gëtt. En:eng Ingenieur:in, deen zu Innsbruck studéiert, léiert méi iwwert d’Bierger. An deem Punkt si mir eis net esou wierklech eens ginn. Op der enger Säit géif en universelle Studium et méi einfach maache fir wärend dem Bachelor oder dem Master ze wiesselen, op der anerer Säit géif de Studium eventuell manner interessant ginn. D’Table Ronde war der Meenung, dass et wichteg wier dat de Studium seng Individualitéit behält.

Bachelor-Inflatioun – Wat ass mäin Diplom nach wäert?

Mam Studium fäerdeg, an elo? Lëtzebuerg oder d’Welt?

Wéi gëtt de Standuert Lëtzebuerg méi attraktiv fir Studéirender déi hier ganz Uni Zäit am Ausland verbruecht hunn. Wat bitt Lëtzebuerg fir Méiglechkeeten am Verglach zum Ausland?

35 Joer Schengen, alles perfekt? – Erausfuerderungen a Problemer fir Studenten an engem vereenegten Europa

Déi richteg REEL zu München ass 2020 leider ofgesot ginn a sollt da Joer drop zu München nogeholl ginn. Als Ersatz gouf et den ACEL meets Politics mam änlechen Thema wei déi initial REEL „Krut Schengen seng Grenzen opgewisen?“ Eng Table Ronde mam Nicolas Schmit, Charel Goerens, Viviane Reding, Karine Basenach an dem President vun der ACEL Sven Bettendorf. Et sollt sech em déi Ongerechtegkeeten tëschent de Studenten an Europa dréinen, dorënner Zielen ënner anerem GIS an Éisträich oder d’Problematik vun der KFZ-Stéier an Däitschland.

Auswirkungen des wirtschaftlichen und gesellschaftlichen Drucks auf den akademischen Werdegang

Informatioun vun zukünftege Studenten, ewéi kënne mir se preparéiren, dass si de Studium NET ofbriechen, respektiv schonn éischter de richtege Wee an der Schoul aschloen.

Étudiant 4.0: Digitalisation du monde professionnel – Défis et opportunités

D’ACEL hat grad e puer wichteg Dossieren hannert sech (ënner anerem Stagegesetz) a wousst net esou richteg wat se als Thema fir d’REEL soll huelen. Digitaliséierung klengt dach net schlecht hunn déi zwee Comitéen sech geduecht an den Etienne Schneider als Wirtschaftsminister op d’REEL invitéiert. Voll gepaakt mat Gadgeten aus dem Nation Branding an der ganz nei gegrënnter Luxembourg Space Agency ass den Här Schneider natierlech gären op d’REEL komm fir iwwert Deep Space Mining ze philosophéieren. D’REEL zu Bréissel war net all ze laang no den Attentater zu Bréissel an den REEL Comité duecht sech et wier dach flott een Hostel no um Molenbeek ze sichen. Kuerz ier de Rallye sollt ugoen ass dunn och de ganzen Timing dunn e bëssen op Kopp geheit gi wéinst engem Anti-Terror Asaz e puer Stroossen nieft dem Hostel.

Beziehungsstatus: Es ist kompliziert! Die Beziehung zwischen Arbeitgeber und zukünftigem Arbeitnehmer

Den Haaptpunkt fir d’ACEL op der REEL war d’Stagegesetz. Dëst huet gutt gepasst bei d’Thema vun der Bezéiung zwëscht dem Arbeitgeber an dem Arbeitnehmer. Nieft engem Diskurs vum deemolegen Aarbechtsminister Nicholas Schmit ass et Mëttes op enger Table Ronde mat dem Thema weidergaang. Dobäi gouf och iwwert d’Orientéierung vun de Schüler a Studenten diskutéiert. Un dëser hunn deelgeholl den deemolegen Héichschoulminister Marc Hansen, Direktesch vun der ADEM Isabelle Schlesser, den Tom Baumert vun der Chambre de Commerce, de Marco Wagener vun der Chambre des Salariés an de Charel Muller als ACELs-Präsident. Moderéiert gouf dës spannend Table Ronde vum Pit Everling vum RTL.

D‘Aussiichte vum Akademiker nom Studium

D‘Haaptthema war dëst Joer den Iwwergang vum Studenten- an d‘Aarbechtsliewen, mat alle Schwieregkeeten déi et ka ginn. Vun politescher Säit hate mer mam Marc Hansen an dem Etienne Schneider direkt 2 Persoune mat dobäi. Sou huet den Här Schneider virun allem iwwert d‘Ekonomesch Situatioun vu Lëtzebuerg an seng International Roll geschwat. Gefeiert ass natierlech och ginn, ouni an awer och mam Minister Schneider, ass et op enger Bad Taste Party, der Soirée Publique an dem Gala Dinner am Kongresszentrum Frankenthal héich hier gaangen.

Die Hochschulreform Bologna: Ein Erfolgskonzept?

Den Dauerbrenner Aide financière war och dëst Joer erëm Thema vum politeschen Debat op der REEL. No der Reform huet d’ACEL nach Nobesserungsbedarf gesinn, De Marc Hansen als Vertrieder vum Ministère wollt sech an dësem Punkt awer nach bedeckt halen. E puer Wochen no der REEL ass de Ministère de Fuerderunge vun der ACEL allerdéngs nokomm.

Selbstbestimmung der Universitäten – inwiefern von der Wirtschaft beeinflusst?

Wéi gewinnt huet d’ACEL dräi Workshopen organiséiert. Themen op der REEL München woren d’Bild vum Student zu Lëtzebuerg, déi gesetzlech verankert Studentevertriedung an eng Diskussioun iwwert d’Beruffswelt an de Beruffsastieg zu Lëtzebuerg. Um Débat mam Minister Claude Meisch gouf nach emol de Point zur reforméierter Aide financière gemeet. Den Haaptpunkt wor awer d’Diskussioun iwwert eng gesetzlech verankert Studentevertriedung.

La Recherche européenne – un investissement dans le futur?

Well d’Uni Lëtzebuerg dee selwechte Weekend 10 Joer gefeiert huet, konnt d’Ministesch Martine Hansen leider just kuerz Freides un der REEL deelhuelen an de Studenten hir Iddi fir d’Zukunft vun der Aide financière kuerz virstellen. Samschdes gouf et dunn, wéinst de Walen, déi eng Woch drop stattfonnt hunn, e politeschen Débat mat Vertrieder vun den eenzelne Parteien. Sou konnten d’Studenten sech e Bild dovunner maachen, wéi déi eenzel Parteien zu de studentenpolitesche Froen stungen. Während der Journée officielle hat d’REEL dunn déi grouss Éier den Ierfgroussherzog Guillaume an seng Fra Stéphanie zu Stroossbuerg ze begéinen. Während dem Mëttegiessen huet déi ierfgroussherzoglech Koppel den Tour vun den eenzelnen Dëscher gemeet, fir an engem labbere Kader d’Delegatiounen vun den eenzelne Studentecerclen kennen ze léieren.

Technischer Fortschritt: Von der Wissenschaft getrieben, von der Gesellschaft gebremst?

D’Haaptthema op der REEL fir d’ACEL war d’Orientatioun an d’Informatioun vun de Schüler a Studenten, wéi och d’Evaluation vun den Impakter vun der Aide financière (Gesetz 2010). En anert Thema op dëser REEL war d’Delegation estudiantine, déi eng legitim Vertriedung op der Uni.lu sollt duerstellen (Projet de loi N°6283).

Enfin diplômé(e), seulement où aller ?

D’REEL war fir d’ACEL zimlech nervenopreiwend ginn. Eng Woch virun der REEL hat den Här Minister Biltgen aus gesondheetleche, awer och perséinleche Grënn entschloss, net op d’REEL ze kommen an d’Directrice vum CEDIES, Dominique Faber, op Zürich laanscht ze schécken. Dëst war fir d’REELaner, déi sech op een aktiven Debat mam Héichschoulminister gefreet haten, eng Enttäuschung. Trotzdem hunn d’ACEL an d’REELaner hir gesammelt Fuerderungen a Resultater aus de Workshopen der Directrice virgedroen. Mëttes hat d’ACEL dann hiren zweeten Débat mat der Schoulministesch Mady Delvaux-Stehres, déi sech d’Fuerderunge vun de Studente fir d’Reform vum Secondaire genee ugelauschtert hat.

La REEL, les acquisitions d’un esprit critique depuis 25 ans

D’REEL wor 2009 fir d’ACEL ee ganz speziellen Event. Op eisem Débat Moies hate mir zousätzlech zum Héichschoulminister och nach den Aarbechtsminister agelueden, fir mat him de Studenten hir Ängscht driwwer keng Plaz, mee och kee Stage ze fannen, ze beschwätzen. Donieft stoung d’REEL ganz ënner dem Sujet vum 25. Anniversaire, mat engem groussen Débat mat fréieren ACEL- a REEL-Leit.

Le Luxembourg face au défi de la mondialisation

Der ACEL hir Haaptpunkten op der REEL woren am Fong och déi aus dem ganze Joer. Do dernieft hat d’ACEL ee Workshop iwwer de Mee 68 – de Student am Wandel vun der Zäit an ee Workshop iwwer d’Studentecerclen a wéi d’ACEL hir Interesse besser kéint representéieren.

Den Débat op der REEL sollt ganz am Zeeche vu Bologna stoen, ass awer zimlech ausgeaart duerch d’Schwieregkeeten déi d’Studenten deemools, duerch d’Aféierung vun der elektronescher Signature Luxtrust, mam Ufroe vun der Aide financière haten.

Die Zukunft des Hochleistungssports in Luxemburg

Leider wor et nach ëmmer d’Unerkennung vun den LMD-Diplomer (Licence oder Bachelor-Master-Doktorat) zu Lëtzebuerg a besonnesch beim Staat. No sengem Kopplabunz (oder Judorolle) ass den deemolegen Héichschoulminister François Biltgen zum Mister REEL gewielt ginn, eng Nominatioun déi sécher nach haut eng Eiereplaatz op sengem CV anhëlt.

Studenten a Kultur, Studentebal a Comitéthéik

Wéi schonn ugeschwat, war de ”5611” e wichtege Punkt am Débat mat der Madame Staatssekretärin Octavie Modert, déi d’Regierung op der REEL zu Stroossbuerg vertrueden hat. E wichtegt Thema war awer och d’Mobilitéit vun de Studenten duerch Europa. Déi belsch Regierung hat Aschränkunge fir verschidde Studiegäng decidéiert a mir hunn eis Regierung opgeruff, alles ze maachen, fir d’Mobilitéit vun de Studente weiderhin ze garantéieren. En anere, méi formelle Punkt fir ofzeschléissen: säit 2006 besteet eng REEL ASBL. Vum Organisatiounscomité vun der ALUS (Stroossbuerger Studenten) an d’Liewe geruff, soll dës ASBL d’Organisatioun vun de REELen op administrativem Plang vereinfachen an d’Institutioun REEL stäerken.

Energietechnik im 21. Jahrhundert und die Verantwortung der Politik

D’Uni Lëtzebuerg an d’Studiengebühre goufen ënnert anerem mam Héichschoulminister François Biltgen diskutéiert. En anert grousst Thema wor de Bologna-Prozess (Harmoniséierung vun den Héichschouldiplomer an Europa) a seng Auswierkungen op de System vun der Aide financière. Deemools gouf vum Minister eng Upassung a Reform an Aussiicht gestallt, déi an där Form sech awer ni konkretiséiert huet.

Les défis de la Suisse et du Luxembourg face à l’Europe et la mondialisation

D’REEL zu Lausanne wor fir d’ACEL d’Geleeënheet den neien Héichschoulminister François Biltgen kennen ze léieren. Dësen huet no de Walen 2004 d’Erna Hennicot-Schoepges ofgeléist. Ee vun den Haaptpunkte vum Débat mam Minister wor d’Entwécklung vun der jonker Uni Lëtzebuerg. Donieft goufen d’Orientatioun an d’Informatioun vun de Schüler, Stéchwuert Studieninformatioun, ugeschwat.

D’Uni Lëtzebuerg, Statut vum Student zu Lëtzebuerg

Wéi schonn am Ufank vum Joer wor och op der REEL d’Uni Lëtzebuerg eent vun den Haaptthemen, déi mat der Ministesch Erna Hennicot-Schoepges diskutéiert goufen. Et wor wéi gewinnt e konstruktiven Austausch. Mat der Arrivée vun der Uni koum och d’Fro vum Statut vum Student zu Lëtzebuerg op den Dësch.

Europa fir unzepaken, e Bléck hannert d’Kulisse vun Europa, d’Unerkennung vun den Diplomer beim Staat

Am Oktober wor déi 18. Editioun vun der REEL zu Bréissel. Während 5 Deeg sinn eng Rei kulturell Visite gemaach ginn, et ass gefeiert ginn an et ass awer och geschafft ginn. D’ACEL huet op der REEL Workshops organiséiert, wou d’Relatioun tëscht der ACEL an hire Cerclen diskutéiert sollt ginn. Ee weidert Thema wor d’Unerkennung vun den Héichschouldiplomer duerch de Staat fir d’Carrière supérieure.

D’Uni Lëtzebuerg wor ee vun den Haaptdossieren, déi mat der Ministesch Erna Hennicot-Schoepges diskutéiert goufen. D’Orientation scolaire et professionnelle wor en aneren Dossier, deen ugeschwat gouf. Zeréck ze behalen ass och nach, datt op dëser REEL eng éischte Kéier e Mister an eng Miss gewielt goufen. D’Iwwerraschung wor perfekt, nodeems d’Ministesch als éischte Miss REEL an d’Geschichtsbicher vun ACEL a REEL agaangen ass.

Die Zukunft – Gewinn oder Verlust der individuellen Freiheit, Ökonomie und Finanzen, Kommunikation, Gentechnologie

Am Juni 2000 gouf dat neit Gesetz iwwert d’Aide financière vun der Chamber ugeholl. Dëse neien Text gouf vun der ACEL aktiv mat preparéiert. Mee och nom Vote woren Diskussioune nach net eriwwer. Op der REEL gouf mat der Ministesch Erna Hennicot-Schoepges en Débat iwwert den Zënssaz vun der Aide financière gefouert. Den Zënssaz sollt, wéi d’Banken et wollten, no uewen ugepasst ginn. Schlussendlech gouf festgehalen, datt de Staat d’Differenz vum reellen Zëns an dem festgesaten Zënssaz vun 2% iwwerhëllt. Donieft ass op der REEL en Accord ënnerschriwwe gi, fir d’Amicale vun der ACEL, kuerz aACEL, ze grënnen.

BTB, études du 2e et du 3e cycle, Fin d’études ouni Aarbecht, d’Aide financière

Am Kader vum 15. Anniversaire vun der ACEL ass d’REEL bei seng Wuerzelen op Karlsruhe zeréck komm. Wéi sou dacks am Laf vun de Joeren wor d’Aide financière ee vun den Haaptpunkten, déi mat der deemoleger Ministesch Erna Hennicot-Schoepges diskutéiert goufen. D’Reform vun der Aide financière, déi vun Ufank un vun der ACEL begleet gouf, ass finalement am Joer 2000 vun der Chamber gestëmmt ginn.

Universität der Zukunft, Fuerschung, europäesch Bildungssystemer, Virstellungsgespréicher, Studiengebühren vs. Numerus Clausus, Fernstudium

D’Reform vun der Aide financière an d’Zesummeschweesse vun allen Cerclen woren déi grouss ACEL-Themen op dëser REEL. Wat d’Aide financière ubelaangt, konnte wichteg Punkte vum Gesetz ergänzt, gestrach oder ëmgeännert ginn. Dëst war nëmmen als gemeinsam staark Equipe méiglech an et kann op eng gutt Zesummenaarbecht an en oppent Ouer vun der deemoleger Ministesch Erna Hennicot-Schoeppges higewise ginn, déi der ACEL stets déi néideg Opmierksamkeet geschenkt huet.

D’Zukunft vun der Industrie an dem Finanzmarché zu Lëtzebuerg, d’Wëssenschaft am Zäitalter vum Multimedia an d’Benotzung vun neien Energiequellen

Wéi schonn ugedeit gouf et 1997 e richtege Reformstau an de studentepoliteschen Dossieren zu Lëtzebuerg. Op der REEL gouf d’Ministesch Erna Hennicot-Schoepges dann och net geschount an d’ACEL huet der Regierung eng ganz Rei un Revendikatioune mat op de Wee ginn. Dorënner wor déi dréngend Reform vun der Aide financière. Deen Text huet der ACEL no den deemolege Realitéiten net méi entsprach. D’Ënnerstëtzung fir d’Studente vum 3e Cycle, d’Studentewunnengen, d’Reform vum Stage pédagogique an d’Orientatioun vun de Schüler wore weider Punkten aus dem Fuerderungskatalog vun der ACEL.

Commercial and legal aspects of the Internet, Britain and Luxembourg in the European Union, d’Orientatioun am 2. an am 3. Unizyklus, Collaboration ACEL-UNEL

Den Internet huet eng ëmmer méi wichteg Roll an der Gesellschaft gespillt. Op dëser REEL hunn mir eis d’Fro gestallt wat fir eng Verännerungen dës Technologie op d’Liewe vum Student géif hunn. Mir hunn eis och gefrot wat fir eng nei Opportunitéite géifen entsoen a wéi déi kéinte genotzt ginn. Beispiller waren eng verbessert Kommunikatioun tëscht de Cerclen an der ACEL iwwert den Internet awer och tëscht den Elteren an de Studenten. Och hei war den 3e cycle nees en Thema. Dacks ass sou een Diplom zu Lëtzebuerg nach net unerkannt ginn oder war gänzlech onbekannt. D’Orientatioun vun der Studente sollt och duerch eng méi Informatioun fir d’Studente verbessert ginn. De CPOS war an där Hinsicht nach net gutt opgestallt an wichteg Informatiounen iwwert en 3. Cycle ware rar geséint.

Montpellier & Aix-en-Provence

Le statut de l’artiste / centre d’art contemporain «PEI», Nuklearenergie, d’Situatioun vum Student no den Studien, Homosexualitéit, Ofdreiwung, AIDS

D’wirtschaftlech Landschaft huet sech an de 90er Joeren zu Lëtzebuerg grondleeënd verännert. Dee Wandel huet deemno och nei Uspréch un de Student a generell un den Educatiounssystem zu Lëtzebuerg gestallt. Wichteg war et fir d’ACEL datt dës Themen op der REEL zur Sprooch komm sinn. Enner anerem hunn d’REELaner no Méiglechkeete gesicht fir de Student bei der Orientatioun ze hellefen an awer och d’Fro gestallt op d’Informatioun vum Student no de Studien net sollt verbessert ginn. Och d’Nuklearenergie war als en méi breeden Débat en Thema op den Diskussiounsronne vun der REEL 1995.

Europa an d’Europaparlament, Mënschenrechter, Entreprisë mam Recrutement vum Personal, Bourse 3ème cycle, Wunnraum fir Studenten, d’Reform vum Stage pédagogique

Eng REEL zu Lëtzebuerg wor eng Erausfuerderung. Verschidden albekannten Dossiere wéi verschidden Aspekter vun der Aide financière, d’Studentewunnengen an och déi zukënfteg Uni Lëtzebuerg koumen op den Dësch

Standuert Lëtzebuerg a seng Zukunft

Wéi schonn ugedeit, wor d’Aide financière ee vun den Haaptdossieren vun 1993. Op der REEL gouf dëst Thema dann och mat de Vertrieder vun den eenzelne Cerclen an de Vertrieder vum Educatiounsministère diskutéiert.

Die Integration Österreichs, der Länder Zentral- und Osteuropas in die EG

D’REEL zu Innsbruck stoung ënnert kengem gudde Stär, well den ACEL’s-Comité bei der Wiel am Dezember eng Virléift fir Bréissel hat. E puer Leit aus dem Innsbrucker Organisatiounscomité haten sech doropshi virgeholl, alles méigleches ze maachen, fir d’ACEL ze blaméieren, an dee ganze Merite vun der REEL op sech ze halen. Dat ass schliisslech net gelongen : d’ACEL huet den Innsbrucker d’Ouverture, den Animatiounsprogramm, a souguer de formelle Protokoll vun der offizieller Begréissung vum Ierfgroussherzog Henri, dee fir d’éischt op enger REEL war, iwwerlooss. Dogéint hu mir fir interessant Gespréichsronnen iwwert Relatioune mat der Presse, d’Relations intercercles an d’Uni Lëtzebuerg gesuergt. Op dëser REEL huet d’ACEL och eng speziell Zeitung erausbruecht. Eis Redaktiounsequipe huet et trotz laange Soiréeën a ganz kuerzen Nuechte fäerdeg bruecht, d’Zeitung ze verdeelen, ier d’REELaner an de Bus no Lëtzebuerg gesat gi sinn.

D’Kulturhaaptstad Lëtzebuerg 1995

Am Joer 1991 war d’REEL zu Montpellier, eng Première a ville Hisiichten. Éischtens, well wéineg Lëtzebuerger do studéiert hunn, an zweetens, well Montpellier wäit, ganz wäit ewech ass. Mä de Wee huet sech gelount. D’REEL ass wéinst der Qualitéit vun hiren Debatten an der “Grande Ferrade” an Erënnerung bliwwen, un déi d’jonk Stéieren vu Montpellier (oder hir Nokomme) sech nach haut erënneren…

Écologie au Luxembourg et en Europe, Évolution du secteur de l’audio-visuel et des télécommunications, Programme Erasmus

Eng exzellent REEL gouf vun der Ekipp ronderëm de Serge Dentzer organiséiert. Déi wichtegst Punkte, déi vun der ACEL ugeschwate goufen, waren d’Reform vun der finanzieller Hëllef fir Héichschoulstudien. De Projet vun der Reform gouf vun de Responsabele vum Educatiounsministère virgestallt. Zu där Zäit huet d’Hëllef aus dräi Deeler bestanen: d’Bourse, de Prêt ouni Zënsen an de Prêt mat Zënsen. D’Reform hat als Zil, den Zënssaz, deen deemools bei 4 % louch, ze reduzéieren an de Prêt ouni Zënsen ofzeschafen an en an d’Bourse z’integréieren, där hire Betrag sollt eropgoen. En anere wichtege Punkt, deen op dëser REEL diskutéiert gouf, war den Erasmus-Programm. E Vertrieder vun der Europäescher Kommissioun war extra vu Bréissel komm, fir déi lëtzebuergesch Studenten an Eegepersoun iwwer dëse Mobilitéitsprogramm fir Studente z’informéieren.

Unerkennung vun den Unisdiplomer, Immatrikulatiounsproblemer vu lëtzebuergeschen Autoen am Ausland, Studentenwunnengen an hir Bezuelung, Organisatiounsproblemer vun der Foire de l’étudiant, d’Aide financière

• Déi 5. REEL war eng Erausfuerderung fir d’Organisateuren. Et huet jo gegollt, déi flott REEL dat Joer virdrun zu Louvain op d’mannst z’egaliséieren. An dat ass de Kollege vun Zürich gelongen, an dat net nëmmen wéinst dem ominéise Fussballmätch géint Schwäiz.
• Interessant woren um éischte Moien dem neien Edukatiounsminister seng Ausféierungen. Et huet eis geschéngt, ewéi wann e neie Wand géif am Ministère blosen an datt eis Revendicatiounen aus deene leschte Joeren op eemol kéinten dach nach op oppen Ouere stoussen. Berechtegt Hoffnungen koumen op. Vill ze laang hate mer an deene leschte Joere missen nokucken, wéi all déi vill Verspriechen net agehale goufen. Och muss een de fantastesche Galadinner den éischten Owend vun der REEL ernimmen. Fir Studenten war dat eemoleg. Vill vun eis haten nach ni an hirer Studentenzäit d’Geleeënheet op engem Iessen derbäi ze sinn, wou esouvill Messeren an Forschetten niewent dem Teller louchen, respektiv esouvill Glieser virun dem Teller stoungen. Datt den Owend onvergiesslech bleiwe giff, hate mer de Sponsoren ze verdanken, mee och der super Laun, déi déi eenzel Vertrieder matbruecht haten.
• Dat war e gelongene Start an d’Débaten vun der REEL, déi och sollte ganz spannend ginn. Niewent Vertrieder vum Ministère de la Santé, mat deenen iwwert déi spezifesch Problemer vun de Medezinsstudenten geschwat gouf, hunn d’Haaptdebatten sech, niewent de klassesche Problemer, ëm déi Punkte gedréint, déi d’ekonomesch Zukunft betraff hunn. An hei huet sech erausgestallt, datt d’Studenten eng wesentlech méi differenzéiert Positioun ageholl hunn ewéi d’Wirtschaftsvertrieder, virun allem mat hirer Vue op Protektioun vun eiser Ëmwelt.

Le chômage intellectuel et les possibilités de recyclage, Le 3e cycle d’études, Les relations entre Harvard et Luxembourg, Les relations entre l’ACEL et les cercles, Les aides financières accordées aux étudiants, Que peut offrir une banque?

• Den Cercle vun Louvain hat sech Grousses virgeholl. Net nëmmen wat den Inhalt vun den Diskussiounen ugaangen ass, mee och den ”à côté” gouf bei den Kollegen aus der Belsch grouss geschriwwen.
• Niewent dem Unterrechtsminister Fernand Boden, a senge Beamten woren och den Direkter vun der Harvard-Luxembourg Associatioun zu Louvain, den de Studenten d’Méiglechkeeten erkläert huet, op engem ”Harvard Model Congress Europe”, respektiv u Visiten op dem Harvard Campus an Amerika, deel ze huelen. D’BIL als Sponsor vun der ACEL wor direkt mat e puer Leit vertrueden an huet natierlech hir Offerten un d’Studenten presentéiert.
• All déi Themen, déi am offizielle Programm ugeschnidde woren, goufen traitéiert. An et wor flott festzestellen, datt d’Diskussiounsronnen genau esou e grousse Succès kannt hunn ewéi déi super organiséiert Soiréeën. D’REEL zu Louvain huet e groussen Succès kannt an huet de Kollegen vun Zürech, déi sech proposéiert haten, dat nächst Joer d’REEL z’organiséieren, kräfteg ënner Drock gesat. Mee op syndikalisteschem Plang wor déi ganz REEL awer eng Enttäuschung. Obwuel een d’Gefill konnt kréien, datt de Minister a seng Beamten géifen de Studenten nolauschteren, huet een awer misste feststellen, datt net vill Konkretes eraus koum, an datt mer säit Joeren déiselwecht Sujeten géifen diskutéieren, ouni wierklech weider ze kommen.

Reform vum Enseignement secondaire, Subsiden fir d’Studenten, Guide du futur étudiant

• Nach ni woren esouvill Studenteveräiner op enger REEL vertrueden, wat eng riseg Erausfuerderung fir d’Organisateure bedeit hat. Mat vill a guddem Asaz haten déi Responsabel awer 4 Deeg intensiv Aarbecht an Amusement kombinéiert kritt, wat kaum ee vun deene ville Participanten jee wäert vergiessen.
• D’Wichtegkeet vun dësem regelméissege Studententreffen hat sech no deenen éischten zwou Editioune séier um Ministère erëm geschwat. Mat den Invitéë Camille Kieffer a J.-P. Schmitz vum Ministère de l’Éducation nationale ass haaptsächlech iwwert d’Reformen am Secondaire an iwwert d’Orientation scolaire et professionelle diskutéiert ginn. Et gouf an deem Kontext iwwert e Passageexame geschwat (do konnt een sech net eens ginn) an ewéi ëmmer ass och iwwer d’Subsidepolitik diskutéiert ginn. D’ACEL huet ewéi säit laangem eng Erhéijung vum Maximum vum Subsid gefuerdert. Et ass een awer leider ëmmer erëm op daf Ouere vu Säite vum Ministère gestouss.
• Och ass mat de Ministèresvertrieder analyséiert ginn, wéi de Salon de l’Etudiant ënnert enger neier Form, an zwar mat der Participatioun vun de Studenten, dat heescht den ACEL’s-Veräiner, kéint organiséiert ginn. Dat gouf duerno och duerchgesat an ass haut quasi 30 Joer méi spéit nach ëmmer als Foire de l’Etudiant en Must fir all zukënftege Student. Datt d’Fuerderung, eng ”Jumboskaart” endlech anzeféieren, ëmmer erëm op der Dagesuerdnung stoung, war selbstverständlech.
• D’ACEL huet sech awer op der REEL zu Paräis och vill mat sech selwer beschäftegt. Hir intern Struktur an hire Fonctionnement goufen diskutéiert. Eng Nei-Orientatioun vun der REEL gouf festgehalen, dat esou wuel wat d’Organisatioun vun den Débaten, wéi och vun de Fester ugaang ass. Och ass d’Representatioun vun den eenzelne Cerclen innerhalb vun der ACEL an op der REEL nei fixéiert ginn. En plus gouf décidéiert, de Comité vun der ACEL vu 5 op 7 Memberen eropzesetzen.

Fräizügegkeet an Europa fir Studenten, Mobilitéit, Subsiden, Studien, Orientatioun, Führerschäin (Gültegkeet am Ausland), Wunnengen op verschiddenen Unien, Studentevertriedung

Jean-Paul Heintz

Et gouf eréischt erëm thematesch, nodeems d’Statute vun der ACEL ënner Daach waren, an déi nächst REEL zu Innsbruck ustoung, déi éischt ausserhalb der vun der Europäescher Gemeinschaft (EG). En Thema, wat deemools wéi haut aktuell ass, waren déi léif Suen. D’Subside waren 1986 op d’Elteren ausgeriicht. Ween doheem net vill krut, ass och net iwwerall hi studéiere gaangen. Deemools ass de Slogan ”12×20” entstane, fir eng gewëssen Onofhängegkeet vun Doheem ze kréien an net dovun auszegoen, datt jiddereen am Summer doheem wunnt. De gefuerderte Montant vun 12×20.000 LUF géifen haut ronn 6.000 Euro Subside pro Joer entspriechen.

Autorisation de séjour, Permis de séjour, Subsides de l’État, Coopération des étudiants avec les instances publiques, les organismes professionnels et le marché de l’emploi, Relations entre les cercles d’étudiants

Aus den eenzelnen Diskussiounsronnen ass d’Iddi entstanen déi spéider ACEL ze grënnen.