De 24. Oktober huet d’ACEL mam Héichschoulministère eng Déclaration d’Intention iwwer Adaptatioune vun der Aide Financière am Kader vun engem neie Gesetz ënnerschriwwen. Mat dësen Adaptatiounen, d’Resultat vun e puer Diskussiounsronnen tëscht dem Ministère an der ACEL, soll d’Studiebäihëllef fir d’Student:inne verbessert ginn, ouni d’Basisstruktur mat de véier Pilieren ze änneren.
Zu de Mesure gehéieren d’Upassunge vun der Bourse un den Index all Semester, eng Primm vun 250€ fir den Ofschloss vun engem Studium an eng Erhéijung vu 5% vum Montant vun der Bourse de Mobilité. Eng weider Mesure déi ville Student:inne wäert ënnert d’Äerm gräifen ass dass den Zënssaz vum Prêt vun der Aide Financière an Zukunft net méi soll vum Staat op 2%, mee op 1,8% gedeckelt ginn.
Dës a weider Mesurë wäerten dann nächst Joer am Kader vu Gesetzesprojet der Chamber virgeluecht ginn. Geplangt ass dass dat neit Gesetz soll fir d’Rentrée 2026/2027 a Kraaft trieden.
