De 16. Januar hate mir eis traditionell Entrevue am neie Joer mat der Dr. Stéphanie Obertin, Ministesch fir Héichschoul, Fuerschung an Digitalisatioun, an hire Beroder:innen am Héichschoulministère.
Ugeschwat gouf hei de weideren Oflaf vun der geplangten Ännerung vun der Bourse. An dësem Kader hu mir schon am Oktober 2024 eng Déclaration d’Intention mam Ministère ënnerschriwwen, wou festgehalen ass wat soll geännert ginn. Mir kruten ausserdem weider Ënnerstëtzung versprach, wat de Suivi vum Stagegesetz ugeet. Hei steet nach eng Evaluatioun vum Aarbechtsministère aus, déi déi aktuell Problematiken soll feststellen fir de Wee virzebereeden, fir dës ze leisen. Ugeschwat gouf och déi aktuell Thematik ëm Titelen vun der http://Uni.lu, wou den Zousaz „of Science“ bei verschiddene Studiegäng gestrach gouf. Déi verschidde Point de Vuë goufen ausgetsoch a fir de weidere Verlaf gouf sech op e gemeinsaamt Treffe mat der http://Uni.lu geenegt.
Och d’Digitaliséierung vun eise Guiden, déi dëst Joer an Ugrëff geholl gëtt, war en Thema. Heifir solleng interaktiv Internetsäit op d’Been gestallt ginn, déi eis aktuell Guiden ersetzt an am September offiziell starte soll. Dës ënner anerem och ekologesch Transitioun gouf vum Ministère begréisst a si ënnerstëtzen eis och aktiv op dësem Wee. Natierlech waren och de Student fir 1 Dag an d’Studentefoire Thema bei dësem Treffen.
Mir si frou, dass d’Zesummenaarbecht tëscht dem Ministère an der ACEL vu béide Säite positiv opgeholl gëtt a sinn zouversichtlech, dass mir och weiderhi gutt zesummeschaffe wäerten.
